Hurðaskellir

Hurðaskellir er háværastur systkina sinna. Hann gekk harkalega um og skellti hurðunum á eftir sér. Fólk sem vildi svefnfrið fagnaði heimsókn hans ekki.

Jón Árnason gaf út þjóðsögur árið 1862. Þar er hann með sömu jólasveina og við þekkjum í dag nema í stað Hurðaskellis var jólasveinninn Faldafeykir. Sumir vilja meina að um sé að ræða sama svein, aðrir vilja meina að Faldafeykir hafi lyft upp pilsföldum eða fellt höfuðfald kvenna í faldbúningum. Hlutskipti okkar að fá Hurðaskelli er þá kannski allt í lagi.

Í Jólasveinavísu Jóhannesar úr Kötlum sem birtist fyrst í ljóðabókinni Jólin koma árið 1932 lýsir hann Hurðaskelli svona:

Sjöundi var Hurðaskellir,

-sá var nokkuð klúr,

ef fólkið vildi í rökkrinu

fá sér vænan dúr.

Hann var ekki sérlega

hnugginn yfir því,

þó harkalega marraði

hjörunum í.